نظام الدكتورة فاطمة الخليفة

اخذت عندها مدخل إلى علم اللغة 

شديدة بالغياب وما تحب التأخير أبد

كانت تطلب برزنتيشن ودقيقة جدا بالتقييم 😑

اختباراتها سهلة ومباشرة

اكتبوا معاها كل شي الاختبار ما يطلع من اللي تقوله بالمحاضرة 

محاضرتها توتر نفسي الدكتورة حيل دقيقة😂

خصوصا ع المشاركة بس أسلوبها حلو وحبوبة

واللي تلتزم معاها بالحضور والمشاركة تضمن a

البرزنتيشن هو بحث عن عالم من علماء اللغة 

قسمتنا مجاميع كل ٤ بنات مجموعة 

بالنسبة لي سويته أنا ورفيجتي بس قلنا لها ما نبي مجموعة ووافقت 😁

وتختارون فصل من كتاب للعالم وتشرحونه بور بوينت 

لازم تهتمون بالبحث بخطواته اللي تطلبها بالتفصيل

ودقيقة حيل على خطوات البحث وتبي مقدمة وخاتمة 

هذا اللي اذكره ومادري اذا نظامها تغير أو لا من زمان ماخذتها عندها 

طلعت منها ب a

عن الدكتور راتب عاشور

راتب عاشور.  مناهج لغة عربية

 

 خذيت عنده اول كورس كان له 

دكتور روعه روعه روعه فاهم وعالم باللغة العربية بجميع نواحيها كتعامل متواضع جدا يقدر الطالب المميز ويحب الي يشارك معاه 

بس يحب يسولف وايد عن اللغة العربية ، اتحسين ان فاهم وهذا كان يضايق الطلبة الي ضايع والي مايداوم يحسون ان يسولف خارج المنهج واغلب الشعبة كانت تغيب ويدشون متأخر 

امتحانه مايطلع برا المذكرة والافضل تنوتين معاه شوي الماده يبيلها مجابل وفهم اكثر  مو صعبه للي يداوم ويدرس ويفهم يحب الطالب الي يشارك معاه ويحترمه 

يطلب زيارة ميدانية /نقد منهج دراسي/وسيلة تعليمية 

انصح فيه وبشده ومن افضل الدكاترة مروا علي 

في ناس تذمه وتقول تغير انا مادري بس صراحه دكتور متواضع ومافي منه طلعت من المادة ب A

--

رأي آخر : 

راتب كشرح كله سوالف

غياب يعذر بعذر قوي

درجات احنا نختار شنو نبي نقسم

اغلبها ع الواجبات واجبه بحث او تقرير او شرح 

ميدتيرم واحد 

تنقين تبين بحث او برزنتيشن كيفج

كان مخلينا احنا نختار

يحب البنت اللي ماتغيب يررررفعها حيل ومحد يسقط عنده

ويعطي بونصات وايد

عنده مذكرة واهو يحدد ويانا

الاختبارات مقالي تعتمد ع حفظج 

اذا حافظه عدل يكون سهل مثل المذكره

طلعت منه ب B- 

انا ما كنت احفظ كل شي و فيه واجبات ما سلمتها يعني العيب مني 😂🖐

بالتفصيل | عروض وقافية د. عبدالمحسن الطبطبائي

●

قبل كل شي المادة الكل ماخذ عنها فكرة انها دسمة و واجد كانوا يأجلونها لسبب أن في سين من الدكاترة كان محتكرها وشوي معقدها بس الحين انفكت هالعقدة ونزلها دكتور اتعب وأنا أقول عسل د. عبدالمحسن الطبطبائي خلوق ومحترم ومريح بالتعامل غير متطلب يعطيج أشياء سهلة عشان تجمعين درجات وفوق هذا كله شرحه يهبل ما شاء الله اللي عليج تنوتين معاه بس .. بس للأمانة المادة شي جديد علينا تتكلم عن شلون نقطع البيت وهالبيت على اي بحر والقافية أشياء تحسينها صعبة بس معاه العكس تماما يأسس صح يبدي معاج خطوة بخطوة وهادي م يوتر ونفسيته حلوة ومحاضرته خفيفة م تحسين فيها ابدا ابدا الدكتور م يسقط ويرفع حيل مو شوي بس لا تكلمينه هو عنده نظام معين بالدرجات و ع اساسه يرفع مثلا البيت فيه صدر وعجز اذا حليتي الصدر صح والعجز خطأ أو العكس يأخذ الصح ويدبله وبجذي اخذتي درجة كاملة ع تقطيع البيت بدال م تاخذين النص ومثال ثاني الفاينل كان 20 سؤال عليهم 40 درجة قال لكم 5 اسئلة اذا حليتوهم غلط بخصم نص الدرجة مو كلها ومن بعد ال 5 اسئلة ببدأ اخصم درجة ع كل غلط امتحاناته سهلة ومباشرة .. بس للأمانة المادة يبي لها دراسة أول المحاضرات خصوصا عشان تمسكينها عدل للأسف م عطيتها حقها وطلعت ب -B

نظام الطبطبائي عروض وقافيه
١٠ حضور وغياب

لج ٣ محاضرات بعدهم يخصم درجات
١٠ درجات للدفتر عبارة عن كتابة مايملي في المحاضرة وإجابه الاسأله التمارين التي تعطي في المحاضرة يطلبه بعد امتحان نصف الفصل
تكليف ١٠ درجات عبارة عن اقتطاع ٧من ابيات المتنبي حسب اختيارج مع الإتيان بالآتي:
ذكر البحر اللذي عليه القصيدة
تقطيع الأبيات تقطيع عروضيا
كتابتها كتابه عروضيه
امتحان منتصف ٣٠ درجه
نهايه الفصل ٤٠ درجه

يعطيكم نهاية كل محاضرة واجب 3 ابيات مثلا او 5 ويقول حلوها كتطبيق ع اللي اخذتوه عشان يدربكم والمحاضرة الجايه هو قبل م يدخل بالدرس الجديد يحل التدريب اللي عطاكم اياه كل اللي عليج تجيب دفتر وتكتبين هالتدريبات مع حلهم
ويعطيج عليهم 10 درجات
و 10 الحضور
و 10 واجب 7 ابيات من المتنبي ع البحر اللي انتي تبينه اي بحر تارك لج الخيار
حاله صح او غلط اهم شي انج حاله يعطيج ال 10
هذيل 30 بمخباتج و70 بيدج ويراعي فيهم
نصيحة لوجه الله لا تأجلين مهما كان السبب
وبالتوفيق 💙